IL SERRAGLIO
Xe inutile che le staghi là de fora, perchè neanche se le starà là in mezo de la strada fina domani de matina lore no le vedarà quel che noi gavemo qua drento in casoto, che xe tute queste bestie piturade qua sora del… de sora del nostro casoto cole tende, cole bandiere de qua e de là, de zinquantamila colori che ga tuti quanti i toni de le bestie originali. Prima de tuto, quando che la pagherà una corona la andarà drita in quel posto là che la sarà intel primo posto drento. Con trenta soldi la andarà in questa altra portisela che la sarà intel secondo posto drento, e con una flica la andarà in quel’altra portisela qua e la sarà intel terzo posto drento. No le staghi creder che quei che xe intel primo posto vede meo de quei che xe intel terzo, no, xe tuta una macacada compagna; anzi, xe cussì più pericoloso nel primo posto che, se qualche bestia salta fora de la cheba, la se fa magnar de tuti quei omini che xe ‘torno.
Cussì ‘pena che la va drento in zanca man, la ga un relenfante che ga quatro zoncole per gamba, e ga un naso cussì grando che ciapa mio paron, ciapa mia parona… che la buta per aria che mai più in tera pol deventar. Vizin de lui xe una struza maestrada, questa struza maestrada sie mesi magna sì, sie mesi magna no. Dopo ghe xe un magnaformigoli che ga rochel per lingua. Questa bestia se peta fora la sua lingua come una cordela… e sloc! intel stomigo zinquanta sessantamila inseti tuti in un colpo come che fussi un bocon de gnochi de patate. Dopo xe un orso ma no xe orso… xe una bestia che no so gnanca mi come se ciama. Ghe xe tre pantegane vecie de due ani zovini. Ghe xe un serpente boia de la forza stremendissima, che te ciapa un leon che ghe strenzi el cor, che ghe salta fora el peto, che una parola no pol più parlar, Dio ghe da un colpo! Dopo ghe xe ancora un crocodil; questo crocodil xe fato come una sariandola ma no xe sariandola: xe come… crocodil… ma (no) xe cussì duro che anche se la ghe passa de sora cola velonzipede lui no se dismissia e ‘l sta là a dormir avanti pulito. Ghe xe un pimpigal, questo pimpigal parla meo che mi, signor, parla meo che lei signora, e ‘l xe cussì domestico che qualunque signorin e signorina se pol ciapar in man.
Dopo ghe xe ancora tante altre bestie che no so nanche mi quante che xe qua dentro. Ghe xe un simioto, un rangotan, l’orso bianco che magna cambric (?), scorze de patate, quel che se ghe da, e un aquila, imperatrice regina de tuti quanti i nostri usei, che i ga dovesto imbalsamar drento inte la cheba perchè iera cussì cativa, perchè senò magnava paron, parona e lavorante.
Cussì, come che ghe go dito, zinquanta e trenta e vinti e diese, se vignirà qua drento de ‘sta porta, se salterà fora de quel’altra come un più grando uomo enziclopedico del mondo. No le staghi far stupidezi perchè de qua a un momento el mio paron va drento inte la cheba, e poderia darse ch’el resti magnado de le bestie che xe drento e ch’el fa saltar oltra del fero de fogo.