- Trieste - Ed. Luglio 2007 (acquista)
Uni nome ga una sua origine, un suo insignificato, e ciamarse int'un modo pitosto che int'un altro vol dir de sicuro qualcossa; ma nome che mi che son mago so coss'che vol dir, perchè mi go studià e no son un inalfabeto qualsiassi. E alora 'desso ve conto pulito coss'che vol dir i nomi... un par un.
Ignassio: Ignassio vien de le Ignassia che xe una vale de la Stransilvana andove che duti se ciama Ignassio e andove che ansi... duto quanto se ciama Ignassio! Qualsiassi roba che vualtri volè darghe nome, quela xe Ignassio. Difati i ga una lingua semplice in Ignassia. Duto xe Ignassio e po bon! Pan se disi Ignassio, sol se disi Ignassio, gratarse la schena se disi Ignassio, giòvedi se disi Ignassio, la panseta se ciama Ignassio, el patoc de 'sta vale se ciama Ignassio, la fersora, el cadin, le savate... duto Ignassio xe, e no se riva capir come che lori istesso i se riva intender. I parla poco e a moti, questo xe vero – difati feghe caso che i Ignassi poco i ve parla – ma istesso no se capissi come che i ve fa. Xe ris'cio de sconfonderse perchè, se un vol vin nero e 'l ghe dimanda Ignassio, quel ghe porta vin bianco e subito nassi pupoli in osteria... Mah, ogni paese ga le sue, ah!