A BARCOLA STASSERA



Son a Barcola stassera e la magia
de 'ste barche che se dondola al tramonto
le me stuziga un fiatin la fantasia;
co 'sto sol che in acqua el se ga quasi sconto,
e 'sto vento che tra i alberi e le vele
el se zoga come i gati fa col sorzo,
e 'l se inventa un tinitinio de campanele,
vado in para, e 'ncora un fià no me inacorzo.

Tra i ricami che ga el mar de oro e de argento
sforzo i oci e vardo el nome de ogni barca:
quela là xe la Rosina e me la sento
'ncora 'desso rider fora del Petrarca,
e quel'altra, là, xe Chiara, 'sai gelosa
de ogni volta che mi 'ndavo 'torno in fraia,
e quel'altra 'ncora Liana, mia morosa
che me ga lassado co son 'ndà de naia.

El sol se sbarufa
za un fià cola luna,
chi sa se 'ste mule
ga 'vudo fortuna,
chi sa se la vita
per lore xe greve,
chi sa se 'nca lore
ga in testa la neve?

Sta vignindo presto sera e le ga sono
la Rosina cola Chiara e cola Liana.
Miramar za pica e par un vecio nono
che a le mule el ghe vol dir la nina nana;
però in fondo de dormir lore ghe seca
a 'ste barche che, siben che sia za tardi,
le volessi, no de 'ndar in discoteca,
ma de 'ver ancora un fià chi che le vardi.

Po domani xe domenica e sicuro
tute quante le se stirerà le vele
e – via lore! – torziolone nel'azuro
barcolan de ziel e mar, come putele:
come mule che le ga passà la vita,
la Rosina cola Liana e cola Chiara,
ma i ricordi mi so ben che xe aria frita
e mi vecio son, per gnente vado in para.

El sol se sbarufa
za un fià cola luna,
chi sa se 'ste mule
ga 'vudo fortuna,
chi sa se le vivi
ancora a Trieste?
Se un giorno le intivo
che gropo, che feste!