Me domando percoss' che te me vardi,
putela, no te vedi che son vecio?
No te vedi che tegno i oci bassi
e me vergogno? 'Sto qua son mi 'desso:

un che no xe più bon de star al mondo
che stenta fin su una come ti
alzar el sguardo; chè xe sta per caso,
so ben, solo per caso, che te ga

vardà 'sto omo triste che camina,
e chi sa che pensier che te ga 'vudo
a vederme passar co'sta figura

bruta che go, belissimo ritrato
de l'infelizità. Va va, putela,
chè mi che passo no son più nissun.